Tempo de preparación: 2 horas.
Dificultade: Media.
Ingredientes
(para oito persoas)
· 1 ½ quilos de pata de tenreira
· Un anaco de ventre de tenreira
· 1 cabeza de allos
· 1 cebola pequena
· 1 k de garavanzos (casteláns)
· Touciño de porco
· Chourizos
· Comiños, especies de callos, pemento doce, guindilla e sal
Preparación
O día anterior á preparación dos callos: Lávanse os garavanzos e déixanse nun recipiente con abundante auga. Lávase a pata e sobre todo o ventre e déixanse pola noite en zume de limón, vinagre, allos e perexil.
O día da preparación: Tómase unha pota e nela introdúcense os garavanzos, a pata, o ventre, o touciño, os allos pelados, a cebola pelada e enteira e o sal. Engádese auga fría ata que os cubra abundantemente (despois se evaporará).
Cócense a lume vivo e débense utilizar utensilios de madeira, para que os garavanzos non queden crus. Cando se vexa que case están cocidos os garavanzos, retírase o touciño e se derrete troceado nunha tixola. Cando estea derretido vértese na pota. Engádense os chourizos (cortados), os comiños, as especies de callos, o pemento doce e a guindilla.
Compróbase o gusto e cando todo estea cocido apágase o lume. Sérvese na fonte coa súa salsa.