A avoa Estrella cociñaba con esta receita o día da festa, preparándoo todo no forno de pedra da casa de Torelo, á beira da lareira. Algunhas veciñas pedíanlle que lles arranxase as súas cazolas.
Tempo de preparación: Tres horas (máis a noite de adobo).
Dificultade: Media.
Ingredientes
(para catro persoas)
· 2 K. de carne (de cordeiro, de tenreira, de porco ou de pito)
· Viño branco
· Aceite
· Patacas (pequenas e enteiras)
· Sal
· Cebola
· Pemento Morrón
· Colorante
· Perexil
· Allos
· Manteiga de porco e touciño caseiro
Preparación
O día anterior á preparación pásase a carne por un adobo, da seguinte maneira:
Nun cunco ponse allos picados, perexil, viño branco e sal. Empápase cada un dos anacos de carne neste preparado. Gárdase nunha pota e engádese viño branco ata cubrir toda a carne. Déixase así toda a noite.
Na tarteira onde se vai a facer a carne ponse, no fondo, chouchas de cebola, pemento e lonchas de touciño caseiro.
Dóurase a carne nunha tixola e vaise pondo na tarteira. Entre capa e capa pódense engadir algunhas lonchas de touciño. Por encima engádense unhas culleradas de manteiga de porco, as patacas (enteiras e pequenas), viño branco, aceite e un pouco de azafrán/colorante.
Todo isto cocíñase no forno a uns 150 º durante 2 horas. É necesario probar a carne para saber se está ben de sal. Se lle falta, engádese cun pouco de auga quente.
Sérvese en fonte alargada, coa carne no medio, as patacas ao redor e uns pementos vermellos por encima, todo iso cun pouco da salsa da carne. Se a carne se prepara nun tarteira de barro baixa, pódese levar así á mesa.